شهزادي عابده سلطان

عابده سلطان، شهزادي: رياست ڀوپال جي شهزادي رياست جي چيف سيڪريٽري ڪابينا جي صدر، چانسلر چيمبر آف پرنسز، اڳوڻي آل انڊيا وومين اسڪوائش چيمپئين، شڪار جي ماهر، ليکڪا ۽ برازيل ۾ پاڪستان جي اڳوڻي سفير واليءَ ڀوپال نواب حميدالله خان جي نياڻي، شهزادي عابده سلطان 28 آگسٽ 1913ع تي ڀوپال ۾ ڄائي. ورهاڱي کانپوءِ نواب حميدالله ته ڀوپال ۾ رهيو. پر عابده سلطان ۽ سندس والده 1950ع ۾ پاڪستان لڏي آيون ۽ ڪراچيءَ ۾ رهائش پذير ٿيون. جتي کيس پهريان چليءَ ۾ ۽ پوءِ برازيل ۾ سفير مقرر ڪيو ويو. 1960ع ۾ سندس والد حميدالله خان جي وفات کانپوءِ عابده سلطان کي ڀوپال جي حڪمرانيءَ جي دعوت ڏني وئي، پر هن ان پيشڪش کي پنهنجي ڀيڻ جي حق ۾ دست بردار ٿيندي قبول ڪرڻ کان معذرت ڪئي ۽ پاڻ پاڪستان ۾ رهڻ کي ترجيح ڏنائين. پاڪستان جو اڳوڻو سيڪريٽري خارجه ۽ ڪرڪيٽ بورڊ جو چيئرمين شهريار خان سندس پٽ آهي، شهزادي عابده سلطان 11 مئي 2002ع تي وفات ڪئي. سندس آخري آرامگاهه ڪراچيءَ ۾ آهي.

داخلا ۾ استعمال ٿيل تاريخون

1913.08.28  عيسوي

شهزادي عابده سلطان 28 آگسٽ 1913ع تي ڀوپال ۾ ڄائي.

2002.05.11  عيسوي

شهزادي عابده سلطان 11 مئي 2002ع تي وفات ڪئي. سندس آخري آرامگاهه ڪراچيءَ ۾ آهي.

شخصيتون - ڀاڱي جون ٻِيون داخلائون